اصولِ عشق میں رد ذات کرنی پڑتی ہے

پرکھ پرکھ  کے ہر اک بات کرنی پڑتی ہے

اکیلے پن کی یہ عادت یوں بے سبب تو نہیں

مجھے کسی سے ملاقات کرنی پڑتی ہے

وہ ایک حِس ہے جو دکھتی نہیں ہے،اس دل میں

سو قید کر کے اسے، بات کرنی پڑتی ہے

وہ ایسا نور ہے رہتا ہے دن میں پوشیدہ

ہمیں تو دن کے سمے رات کرنی پڑتی ہے

کسی سے آس بھلائی کی کون رکھے،یہاں

دعا بھی لینی ہو،،خیرات کرنی پڑتی ہے

تمہارا وصل بھی موسم پہ مُنحصَر ہے صنم

ہو تم سے ملنا تو،، برسات کرنی پڑتی ہے

کہاں سدھرتے ہیں حالات خود بخود اے دوست

کسی تو ایک کو، شروعات کرنی پڑتی ہے

یوں بے وجہ ہی ہمیں گر کوئی ستاتا ہے

تو ظاہر اپنی بھی اوقات کرنی پڑتی ہے

نوازتا ہے کوئی ہم کو گر مدارت سے

ہمیں بھی اس کی مدارات کرنی پڑتی ہے

منافقین سے پُر اپنا ہو قبیلہ حمید

تو پھر عدو سے مصافات کرنی پڑتی ہے

حمید اللہ خان حمید